哲雲走進森林的好奇旅程,閒遊加德滿都圓滿回

埃文戈丛林乡间俱乐部酒店(Country Club Aivengo Hotel Jungle)¥261起立即预订>

独特野生度假村(Unique Wild Resort)¥164起立即预订>

独特野生度假村(Unique Wild Resort)¥164起立即预订>

展开更多酒店

展开更多酒店

展开更多酒店

发表于 2012-12-29 10:13

話咁快就到第六日喇,今朝要5:30am起身食早餐,因食完就要騎大象入森林﹗图片 1昨天的瘦狗仔原來今朝在我倆的房門等我地﹗佢一定十分肚餓了﹗图片 2我明明買了明信片回加德滿都時寄出給朋友及自己,可惜到我寫遊記這刻已成個月還未收到﹗係咪寄失左呢?定係加德滿都Thamel那間書局呃我錢?图片 3酒店的早餐很豐富,我們給了瘦狗數片麵包,牠滿意地吃了﹗图片 4食完早餐就集合,我地跳上小貨車到騎象的地方﹗瘦狗追了出來......图片 5導遊尋日已叫左我地今天要穿長褲及波鞋。但印度家庭依然故我,全家總動員四人一齊著拖鞋及短褲,見到真係笑死﹗图片 6十分鐘車程,我地到了森林的入口﹗图片 7呢個騎大象入森林活動叫Elephant Ride Jungle Safari,來過哲雲Chitwan的一定知曉,是必玩活動﹗一隻大象一個象夫再載四個人就出發﹗图片 8我幾時都講我地是最幸運的,食家在出發前本來擔心唔知要同邊對人一齊坐象。點知去到,導遊小哥話要印度四人家庭分條友過來與我地坐﹗佢地四個當然耍哂手表示抗拒,最後是我地兩個一隻象,真係多謝佢地﹗呵呵﹗變了我們的私人大象旅程﹗图片 9走上象籃時要小心點,因大象有時會郁來郁去,一不小心會飛落街﹗就現場所見,好多朋友都對我地只兩個人就可以騎象都報以奇異的目光,遊客更是羨慕不停指指點點﹗图片 10好,我地兩個坐穩喇,大象出發﹗图片 11象夫哥仔先去入口取飛登記﹗图片 12然後就向森林進發﹗根據網上資料:在尼泊爾有一處叢林是野生動物保護區,它叫做哲雲/奇旺國家公園( Royal Chitwan National Park )奇旺位於距加德滿都 120 公里的雷普提谷地( Rapti Valley )占地 980 平方公里,英國王室最早覬覦這塊土地來此「狩獵」,也是尼泊爾王室的御用狩獵場, 1961 年才正式對外開放並禁止狩獵, 1973 年成為尼泊爾第一座國家公園,其目的為了保護即將瀕臨絕種的獨角犀牛。 1984 年被聯合國教科文組織列入世界遺產。現在的奇旺境內有鹿、獨角犀牛、野豬、孟加拉虎、野像等超過 50 種哺乳動物,和翠鳥、老鷹、夜鷺、犀鳥等 525 種鳥,據當地導游表示,在 2 、 3 月時看到老虎和一些罕見動物的機會相當頻繁。图片 13好老實我都係第一次入森林,仲要騎住象行兩個鐘,我估唔係人人試過﹗自已騎象影唔到自己,只有影下印度家庭大家再幻想我地在象上情況吧﹗图片 14森林當然多樹,大象唔會理你只管向前行,故路上要小心有樹上的樹枝,蜜蜂巢等,萬一打中都咪話唔痛﹗一路上都幾多丫枝打在身上,很懷疑穿上短褲拖鞋的他們有冇割損﹗图片 15在象上看風景,感覺特別寫意﹗图片 16行森林當然為左睇動物,話說由於大象有自己的氣味,會蓋過人類,故你騎在牠身上其他動物不會發現你﹗來哲雲國家公園,很多朋友就是為了一看的就是看這獨角犀牛﹗图片 17這印度獨角野生犀牛層皮好似著左鐵甲似的,好有型﹗是受保護的動物,全球好似得番千幾隻吧﹗犀牛並非經常出現,很多遊人來到森林也未必會遇到呢,我們都算好幸運了﹗﹗佢地好似好嘆咁在玩水﹗象夫會停下大象俾我地影下相,拍下照﹗图片 18除了睇犀牛之外,仲見到好多小鹿群﹗图片 19你地睇後面印度家庭玩得幾high﹗图片 20除了在森林漫步,騎象最過癮是落河,在象上好似就跌就跌落河咁﹗图片 21衝呀﹗图片 22大象我估佢都幾辛苦,一落河第一時間就勁飲水﹗图片 23印度朋友幾Happy﹗图片 24再穿越大平原﹗來哲雲騎象其實好似分好幾種價錢,我們這次旅程是兩小時的,好像有些去到四小時﹗但我老實說,可看到的動物品種並不多,開頭一小時還覺得幾過癮,及後時間在森林走來走去其實也挺悶的﹗所以兩小時夠哂數﹗图片 25巧遇來加德滿都飛機上帶團的那香港導遊,大家在象上擦身而過,互相打招呼﹗香港旅行團的團友見我地可以兩個人一隻象,即時投以羨慕的目光﹗哈﹗图片 26兩小時終於到終點,這個小兄弟就是我倆的象夫,見佢都幾落力幫我地搵動物﹗小費不可少吧﹗图片 27終點有些尼國姐姐會賣些香蕉給你,50Rs有一份。我們買了兩份請今次勞苦功高的大象哥哥吃﹗再拍些照片﹗图片 28吃完香蕉,大象開心得大叫﹗謝謝你啊﹗图片 29騎完大象回酒店休息一小時,車都未落阿瘦狗已在門口等我們了﹗未有飯開喎,無野俾你食﹗图片 30這張照片最能表現哲雲39度有多熱。我在房間沖完涼再行出門口三分鐘,手上的每一個毛孔已經在冒汗﹗痴那線﹗图片 31中午前的活動是Elephant Bath,我地兩個都無諗住玩,因為見到條河其實好多象屎﹗图片 32印度家庭的小朋友參加,佢話就話係行程,不過其實完成後都要俾100Rs小費象夫的﹗图片 33其實唔係Elephant Bath,係Elephant同你Bath,大象會吸入河水再射在你身上,就係咁玩幾十吓左右,小朋友當然開心,我地就叫導遊幫手影下相便算﹗图片 34玩完之後乘車回酒店,我地兩個決定不在酒店午餐,自己於中午行出去市中心吃飯﹗天雨關係,成地都係爛泥,對波鞋真係唔洗要﹗踩完屎似的﹗图片 35市中心無咩遊客,十分憩靜﹗當地居民一見到我地都會投以奇怪的目光,也許覺得做鬼咁熱都會有人來哲雲﹗图片 36找了一間在路邊的小店開餐,叫Typical Nepai Kitchen﹗图片 37小店既是Kitchen亦係士多,由一個尼泊爾婆婆經營﹗图片 38也許沒有遊客關係,我們點了菜,婆婆先叫我地坐坐自己走去街市買餸﹗哈﹗真係即叫即買即煮﹗图片 39這款芒果汁幾好飲﹗图片 40我點了尼泊爾雜菜春卷。图片 41食家就點了雞肉MoMo,雞肉MoMo一咬皮煙韌亦有肉汁,好吃﹗图片 42春卷個皮就嫌佢厚了點,但即叫即做的食物,總覺得美味﹗最後食鬼哂﹗图片 43這間小店價錢便宜,十幾蚊就有一個餸,反而嘉士伯最貴要Rs 270。最後坐左個幾鐘Rs 800埋單,好抵食﹗图片 44這兒肥貓我地坐咁耐佢就坐咁耐,見佢好似好肚餓咁給了牠吃薯條,佢吃得很開心﹗图片 45在市中心行逛,見有間精品店的老闆在自己造手工藝,入去看看﹗图片 46老闆很Nice,不停為我地介紹佢既木製精品,我地都忍唔住買番幾件,記住佢有木製的小犀牛鎖扣很可愛,只要Rs 100一隻﹗又係那句,記住要講價﹗图片 47步行回酒店,酒店旁有一家人自己養了兩隻大象,唔知叫佢地去邊呢?图片 48這就是我們住的酒店喇,我倆住在下面的一層﹗图片 49酒店其實幾大好多客房的,但由於無遊客,變相我們霸哂﹗图片 50瞓了個午覺,4:00pm又再出發,這家就是我們尋晚去飲野的無電士多。店主Susan見我地出去玩都會同我地揮手﹗图片 51下午的旅程是沿河划船遊森林,為的是要睇河上的鱷魚﹗图片 52一條船坐我地兩個及四人印度家庭再加導遊及船夫﹗图片 53出發,天色突然陰暗,仲下起雨來﹗图片 54雨愈來愈大,我又無傘,慘慘慘變落湯雞﹗图片 55導遊話這個是鱷魚洞﹗可惜的是全程只係睇到一次鱷魚眼在水面,睇唔到成條鱷魚,導遊話六月不是季節,如到入秋後會一排排在河邊曬太陽,十分壯觀﹗图片 56船程一小時,之後是一小時的森林步行探險﹗图片 57山就行得多,不過真係走入森林行都幾得意,大部份動物其實都聽到人聲所以會避開,只有遠遠去睇佢地生態﹗图片 58遠遠望見小鹿群,其實已很興奮呢﹗图片 59之後去了大象培育中心﹗图片 60這是象的頭骨﹗图片 61大象原來識聽訓練員的指令,這是不少象夫會用的指令說話﹗图片 62在園內有好多小象仔,十分可愛﹗图片 63由於只得幾個月,佢地行路好似跌下跌下似的,個樣子又傻傻地,好搞笑﹗图片 64小象總是黐在爸爸媽媽身邊,連鐵鏈都唔洗,行幾步佢又走回象爸旁﹗图片 65都好多小象在這個培育中心呢﹗图片 66呢隻好似係三歲,個樣已經成形﹗图片 67行咗成個幾鐘,已經接近六點半要回去了﹗图片 68咁岩俾我地見到有人趕牛羊,一群牛羊衝過河的奇景真係都幾震撼架﹗晚上在酒店吃過飯,由於太累關係,食家又有點身體不適,今晚都係乖乖在餐廳叫多兩支啤酒,留在酒店飲完就瞓了﹗明天中午要乘飛機回加德滿都,這是我倆在尼泊爾哲雲的最後一天﹗我的網址: : facebook.com/smallsmalllin 我的美食地圖: :

发表于 2012-12-29 10:11

尋晚都幾早瞓關係,今朝特別醒神,第五天的早上要與波卡拉說再見。图片 69從房間向外望,今天又濃霧滿天,看不到雪山美景,所以話我地兩個尋日在Dhampus真係十萬個幸運﹗图片 70酒店的早餐也挺豐富,分量夠哂多,一個人根本吃不完﹗图片 71吃過早餐收拾好行李,8:30am便要到大堂集合,因我地訂咗9:00am出發Greenline的巴士到哲雲。图片 72左邊那位就是經理Raj,佢知我地走都特登行埋黎問我地呢幾日玩成點﹗我答佢很滿意,佢亦叫我地兩個可以上Tripadvior幫佢賣吓廣告。而家寫遊記先記得我地仲未上去留言添,之後整番﹗图片 73酒店車我地到巴士站,先寄存大件的行李,再上Greenline的巴士﹗图片 74從車窗望出去是Greenline的Office﹗由波卡拉到哲雲的車程是5小時﹗唔知係咪早出發既關係,架車竟然唔開冷氣,吹鬼脹﹗图片 75行車個半鐘左右會到一個大站作休息十五分鐘﹗搭親長途車就實有呢尐機會,都係落車痾下尿,放個屁咁﹗图片 76買了包印度出的All in One Nuts,唔掂,全部食物都碎碎濕濕咁,棄之.........图片 77其實在車上一路的風景也不錯,離開波卡拉市區後,其他地方更窮,大多都是農田及園野,亦見不少簡約的矮樓房。图片 78搭了兩個小時左右,巴士載我們到一間Resort吃午飯﹗我地都唔知原來搭車是包午飯的﹗图片 79呢間Resort環境很不錯呀﹗Greenline巴士服務同質素果然是尼泊爾最出名的﹗图片 80食物很簡單,就是咖哩雞、雜菜等,自取任食,仲有茶啡任飲,味道唔錯,包你吃飽﹗图片 81吃完飯飽飽,再上車竟然發現原來這Resort是一個中途站,早上搭的大巴目的地不是哲雲的﹗去哲雲就要在這兒轉車﹗由於時值旅遊淡季,我地兩個轉咗上一架七人Van仔........車上只得我地兩個同司機,變相包車,發達了﹗图片 82轉咗車爽好多,起碼車上有冷氣,食飽瞓左個幾鐘陣之後,兩個幾鐘左右慢慢已到達哲雲,又估唔到都幾熱鬧﹗图片 83最後2:00pm我地終於順利到達哲雲的巴士總站﹗真係坐到屎弗開花﹗我倆book的Unique Wild Resort有位小兄弟來接送﹗图片 84架車只係得我地兩個,唔通今次哲雲酒店又係得我地兩個人?图片 85十分鐘就去到Resort喇,呢個就係經理,送上Welcome Drink,核對我地既入住資料﹗想說我地兩個呢次旅行所有Book既酒店,除了加德滿都外是學聯Package外,其他全部都係上佢地既酒店網頁直接向酒店傾價錢,由於時值淡季關係,酒店都願意提供比較便宜的價錢呢﹗這間Unique Wild Resort我地訂左三日兩夜Package,包酒店住宿、所有活動及三餐,每人US 95,抵爆﹗就我地所體會,只要你唔飲啤酒凍飲既話,基本上唔洗洗其他錢。图片 86之後發現原來今天只得我地兩個客人及一家四口的印度Family。先說房間,房間整潔,空間大,有冷氣及熱水,唔錯呀﹗图片 87供電方面,早上9:00am後及中午通常都會停電,而夜晚就無問題,即係瞓得好﹗图片 88再講酒店位置,離Town Centre大約十分鐘腳程,位置在街道最角位,故不會聽到車聲及遊人叫罵聲,清靜舒服﹗酒店空間也挺大,在農田旁,四周種滿花草樹,感覺田園清新亦自成一國。图片 89就在房間行過對面就係酒店餐廳喇,我地梗係坐出面啦﹗图片 90其實頭先坐車休息時已吃過午餐,但來到酒店既然包埋又忍不住要再吃﹗食物無得選擇,人人一樣,是日午餐是蛋花粟米湯﹗图片 91有通粉、炒飯、雜菜、白汁雞及薯條,睇見都飽吧﹗哈﹗图片 92唔知係咪淡季無咩人會來的關係,這隻瘦瘦的狗仔見我地在餐廳,便一直坐在我們隔離﹗我們便把午餐的炒飯給牠吃,牠吃得十分開心﹗估唔到一飯之恩佢永記於心,這三天只要我們在resort內,牠便無時無刻的都跟在我倆後面,連入房瞓覺佢都在門口守侯﹗图片 93吃過午餐,經理又走過來同我地講講這三天的行程。活動都set得幾好,起碼活動與活動之間都會有休息時間,岩哂我地呢尐HEA人﹗图片 94食完午餐先3:30pm,當然入房涼下冷氣,Show下我地買左咩無聊野先﹗Condom佔大多數,買左成廿盒﹗哈﹗图片 95導遊話天氣是38C,仲要極潮濕,只要有一刻離開冷氣,唔洗五分鐘我已全身冒汗﹗真怪不得是淡季,呢尐夏天日子來哲雲要有心理準備﹗图片 96這個是哲雲國家公園的地圖﹗图片 97來國家公園會入森林,這兒最出名的是大象、獨角犀牛及鱷魚﹗图片 985:00pm出發喇,今天的活動是到處走走,去國家的大象保育中心﹗這是Unique Wild Resort的入口﹗图片 99先是參觀哲雲的原住民的Thrau Village,當地仍有不少居民以古代生活方式生存呢﹗图片 100尼泊爾街頭大多只見到流浪狗,在哲雲反而貓居多。图片 101要介紹呢三日同我地一齊參加所有活動的印度家庭,爸媽及兩兄弟。可能我地係亞洲人關係佢地好似對我地有尐芥蒂,全程都無咩傾計﹗图片 102再參觀是政府的大象保育中心﹗我地兩個一向都好鍾意大象,來哲雲就最岩,因象兒成日在條街走來走去﹗图片 103成日見到大象打起沙塵,原來佢地唔係玩沙,而係因為多蚊既關係,佢地將沙塗在身上以避免俾蚊咬﹗有如我地塗蚊怕水,真聰明﹗图片 104我成日覺得大象好似隻隻個樣都係笑緊似的﹗图片 105呢個肥佬就係我地呢三日既導遊喇,每有參觀的都是佢帶隊的﹗佢雖然日日在哲雲,但天氣由於太熱關係,佢都熱到成身汗話好辛苦不停抹汗﹗图片 106在這兒住的大象有福了,因為除了有嫩葉吃外,仲會有專人用草包住尐米呀營養飼料等俾佢地食,佢地叫做「Candy」,見佢地食得好開心﹗图片 107睇完大象,我地又出發去其他景點喇。在這兒記住要做好防蚊措施,唔係會俾蚊吸乾你的血﹗图片 108我們到了哲雲國家公園的博物館,得幾個標本,又熱又焗空洞洞的無咩好睇﹗只係見到呢尐有機會在國家公園出現的動物介紹﹗图片 109穿山甲都有喎﹗不過見唔到﹗图片 110印度朋友可能由於太熱關係,對任何事也提不起興趣﹗图片 111是日最後一個行程是在湖邊看日落﹗图片 112可惜的是天濛濛,日落就一定睇唔到架喇﹗38度的大熱天氣下,我同食家件Tee都濕咗九成,導遊問我地有冇興趣,我地第一時間耍手擰頭,之後搭番車回酒店﹗图片 113回房沖個涼,吸番半小時冷氣後,精神哂,我們到餐廳吃飯﹗今晚的活動是去睇民族表演,我地零興趣於是同導遊講不出席,自己出去行吓好過。图片 114是日晚餐再次是薯條白飯,仲有尐好似糖醋排骨似的餸菜﹗想說這兒的待應十分有禮,雖然好多時候都只係得我地兩個客人,但佢都十分用心招待。由於我地去親餐廳就係隊啤,由朝飲到晚,第二次來吃飯佢一見我地已問係咪要Beer了﹗图片 115吃過飯才8:00pm左,我們諗住自己行10分鐘去市中心買下手信飲下野,點知出到去都驚一驚,因為呢十分鐘路程全無街燈﹗無街燈都唔緊要,因我地有電筒又認得路,最可怕係尼泊爾人竟然可以在全黑無星無月亮光既環境下走來走去,明明以為前面後面無人突然在黑暗中有個尼人經過你身邊,仲要同你講Namaste,你都咪話唔驚﹗图片 116可能是淡季關係,市中心入夜後只有少量餐廳經營,於是我地兜左個圈之後打道回酒店﹗图片 117就在酒店前100米,見到有間有微光既田園士多,入面有不少外國遊客在門外飲Beer。既然找不到酒吧,就在這兒盡興吧﹗這兒原來由右手面那澳洲藉女子Susan打理,佢好開心有人來幫趁,仲走埋黎同我地傾計,佢話其實佢想將這個田園打造成廉價的小旅舍,讓背包客能有便宜的居所,佢已做好幾間房,但好可惜的是這兒取不到電,無燈無風扇又無得叉電,故很難經營﹗咁岩今天竟然有個澳洲藉中年背包客入住,原來只係收300Rs一晚,有瓦遮頭算係咁吧﹗但晚上溫度仍是36度左右,我估都相當難捱,我就一定會瞓唔著了﹗图片 118這隻是Susan的寶貝﹗肥肥的乳牛貓﹗好可愛﹗图片 119就係咁,我地兩個今晚就在這兒飲了八支大啤,飲到十點幾返酒店瞓覺﹗由於佢地無電,一開電筒見光就有幾百隻飛蟻草蜢昆蟲等跳埋來,我只可以說觸目驚心﹗在旅行中能與不同的過客傾計,感受大自然的氣氛,是件挺快樂的事,雖然內容來來去去都係那些膚淺問答,但總有得著﹗這就是我倆在尼泊爾哲雲國家公園的第五天﹗我的網址: : facebook.com/smallsmalllin 我的美食地圖: :

发表于 2012-12-29 10:17

話咁快就去到第七天,亦都係呢個遊記既最後一回﹗最後一天的活動本來是去森林睇雀,但我地兩個對雀真係無咩興趣,故尋晚同導遊講定不會出發,亦都私人醒左尐美金俾肥佬當小費﹗图片 120唔洗六點起身,我地九點先慢慢起床收拾細軟,再去餐廳食埋早餐,回來坐多陣﹗由於住咗幾日又根本無咩住客關係,同幾個呢度執房的小兄弟傾多兩句,得知他們的人工不多,但好奇怪第一晚見到佢地可以出去隔離士多買啤酒飲﹗最後我將在機場買的美國香煙送予他們,他們很高興﹗图片 121是時候離開,瘦狗仔一直送我地出門口,真係一飯之恩天天記住,我倆雖然唔多敢掂佢,不過由於日見夜見也生了感情﹗狗仔你要努力呀﹗自己出外搵食啦﹗整體來說Unique Wild Resort的服務不錯,房間舒適,位置獨處一角夠寧靜,餐廳食物很好,待應生與服務生也有禮貌盡量協助,肥佬導遊係Hea少少但其實又真係太熱,最緊要價錢不貴,US 95玩三日兩夜全包抵到爛﹗推薦呢﹗图片 12211:00pm 導遊送我地兩個到機場,Resort離機場約半小時車程左右﹗图片 123又係同出發講同一句說話,尼泊爾的內陸機真係唔洗咁早就到機場,餐廳都無間,鳩流流呆等,飛機又無咩人搭,根本過關安檢就5分鐘已搞掂,在機場真係悶到抽筋﹗图片 124呢張就係回程加德滿都的機票了﹗又要多談這張機票,是在波卡拉最後一天忍受不住酒店經理的推薦而買的,本來US 100一張,最後講價只可講到US 80一張﹗其實我倆也掙扎了兩天,因兩個人價錢也挺貴呢﹗不過算了吧,最後一天,都費事舟居勞頓,搭飛機﹗图片 125哲雲/奇旺國家公園的大地圖﹗图片 126我倆又算好運,今次回程飛機由於天氣好,沒有Delay,可以12:30pm準時上機﹗图片 127細細的機場就係咁簡單,推門自己行去搭飛機﹗图片 128這就是可愛的超小型哲雲機場﹗图片 129昨天行程提到那一家木雕刻精品店,在那兒就有這個哲雲獨角犀牛的鎖匙扣買﹗我們掛在背囊上,及後乘飛機回香港,同行的香港人都話這匙扣很可愛有趣,如在哲雲的話不坊買番幾個﹗图片 130十五分鐘便到達加德滿都,領取行李後又要搵的士回Thamel,的士架架都話公價是600Rs,我開價300Rs,最後400Rs成交﹗图片 131回到酒店已是2:30pm,再次check in Hotel Marshyangdi,放下行李我倆又出去走走﹗图片 132帶著旅遊書,路經一間咖啡店,唔記得店名。图片 133簡約的點件三文治及咖啡,吃完便走﹗图片 134第一個目的地是Garden of Dreams。图片 135此地方是以前唔知邊個皇室的私人庭園,及後開放收入場費俾市民入場。在尼國這等落後國家出現這種人工的美麗後花園,老實講顯得格格不入﹗图片 136四處是歐陸式的亭臺樓閣。 图片 137環境係不錯,但佢既設計極多暗角,唔知幾時開始已經成為偷情勝地﹗不少情侶在暗角處摸手摸腳摩摩揸揸,好似在這兒公然親熱是合法的﹗图片 138這些其實並不過份,我眼見有更過份直頭女騎在男身上郁下郁下.......不過廢事影人相吧﹗图片 139小子的手開始有所動作﹗图片 140真係大開眼界,園內有餐廳,還是吃些東西冷靜一吓比較合理﹗图片 141呢個咁既偷情花園入場費每人是Rs 160,好老實講十分搵笨,也許當地人未見過如此人工美景,但我絕不建議香港人參觀﹗其實無咩特色,行兩步就有情侶在你面前卿卿我我,你會一路行一路小﹗图片 142點了海鮮湯及意粉,味道麻麻,價錢亦貴﹗图片 143嘩﹗好開心啊..............woo.............﹗图片 144埋單Rs 1500,現場所見其實都無咩遊客到訪,睇黎都係我地兩個白痴才會來﹗图片 145要睇此等建築來「香港公園」吧﹗唔洗錢,又大又靚﹗呢度真係要負評﹗图片 146之後我地下個景點係Durbar Square,跟住旅遊書又問下人向前行﹗图片 147再一次經過第二日到過的舊城街市﹗肥鼠在白天也橫行無阻﹗图片 148行行下其實都已經蕩失路﹗迷失方向﹗图片 149明明係街市,中間唔知點解有個廣場有個大銀幕,唔通夜晚在街市有波睇?图片 150唔知係咪星期六既關係,行人多得很,當然對我地呢兩個中國樣貌的人投以奇異的目光﹗图片 151途中亦有個好奇怪的尼泊爾阿伯跟住我地後面,不停問我地係咪去Durbar Square,我地唔敢亂應佢。我估佢係想做我地導遊吧﹗行咗兩條街佢亦知難而退﹗图片 152終於到達Durbar Square﹗图片 153好老實我地對古跡的興趣是零,入場亦好似要成百蚊港紙,於是決定唔鬼入去,只係在門外影兩張相便算﹗叫做Check咗個point﹗﹗图片 154旅遊書話有個地方叫New Road新馬路,相當繁華,有全加德滿都唯一的油柏路,原來就在Durbar旁﹗馬路兩旁的店鋪確比之前簡陋的街市士多光鮮,賣的以手錶、電話、太陽眼鏡及衣服鞋襪為主﹗尤其以太陽眼鏡店最多﹗看來加德滿都富起來的象徵就是要帶黑照﹗图片 155旅遊資料話呢個商場是全加德滿都最勁既Shopping Mall﹗叫Bishal Bazar﹗图片 156入面賣既係珠寶、太陽眼鏡及衣物等,遊人止步吧,真係唔岩你的﹗哈﹗图片 157行到6:00pm,雙腿酸軟又熱又濕,是加德滿都的尾聲了﹗見對面馬路古色古香建築上面有間開哂窗既餐廳,走上去Happy Hour先﹗图片 158地點在新馬路,Shisha Cafe,有水煙食架﹗图片 159窗邊位置很好,可一覽新路的繁華盛世,真係旺過旺角﹗图片 160水煙我地就無咩興趣喇,不過只係Rs 222,如有興趣玩下既其實試得過,平香港十幾倍仲要咩味都有﹗記得上年在土耳其吃都要$40左右,尼泊爾這兒很便宜呢﹗图片 161最後一天,酒精是絕對,一人隊左三杯生啤﹗大家談談這次旅程的感覺,本來出發前也很擔心這比較落後的地方會不會有危險。但事實上不少尼泊爾人也很Nice,也許因為窮困關係,當地人笑容比較少,沒有歐洲人的熱情,卻有份純樸無華的熱心,相處下你會覺得他們就是熱愛簡單的生活﹗知足常樂,這也許就是我們應該學習的地方呢﹗絕對值得一到的地方,推薦﹗飲完酒飽飽地,搭的士回酒店坐番陣,執一執行李,之後落Thamel四圍行下睇下有咩手信買﹗图片 162八點的Thamel,天還未黑﹗提提大家就在酒店前兩個街口有間書店,可以買郵票及代寄出明信片,那書店內的英文小說更比香港平一半,食家掃了幾本呢﹗图片 163好老實講尼泊爾無咩好買,尼泊爾風的首飾其實女人街大把,到處逛逛找晚餐﹗行經唔記得邊間酒吧下面,有人在我地耳邊說:"大麻﹗大麻﹗" ,我地當然一笑置之,但我估外國遊客有很多都好此道﹗图片 164吃了十幾廿餐西餐,是時候轉轉口味,我們今晚吃日本菜﹗图片 165間野叫做OFUKURO NO AJI,我都講唔到俾你聽在那兒﹗但Ruby的書是有介紹的﹗图片 166店內食物由日本人主理,現場所見亦有日本顧客呢﹗图片 167環境光鮮,坐得舒服,服務員亦醒目,我地當然又係繼續隊下啤啦﹗图片 168在窗邊影出去的招牌﹗图片 169食家點了烏冬﹗图片 170而我由於太掛住串燒,所以點了串燒套餐﹗图片 171食物真係唔錯,串燒烤得恰到好處,醬汁香甜,推薦呢﹗吃完晚飯其實只係10:00pm,但由於下午已經開始隊酒關係,已醉醉地,明天早機最怕起唔到身,故都係乖乖回酒店休息﹗結束我們的八日七夜之旅﹗图片 172第二朝六點半就起身,落街吃完早餐後便打的去機場回香港﹗图片 173話說入閘前有個小插曲,就係我地排隊入機場,見個電視顯示出來的航班時間竟然沒有我地兩個班機,仆街了,唔通買錯日子?我倆開始緊張了,因如班機取消或有咩問題的話,便要流落異地,身上錢又洗鬼哂,唔通瞓街?图片 174真係唔屌都唔得,入到閘問職員佢地話打漏咗,仆街啦,呢尐都有得錯,真係嚇死人﹗图片 175有驚無險,當然順利排隊去候機。图片 176這亦是我倆最後一張照片,真真正正完成我們的2012尼泊爾八日七夜歷險之旅﹗打這長長的遊記前,其實都知唔會有太多人有興趣去尼泊爾,但為了為我倆留下美好的回憶,也堅持把她完成﹗希望呢篇遊記內的資料對有興趣到尼泊爾的網友有用,如果網友們對尼泊爾自由行有咩問題,我地兩個都歡迎與大家分享,希望你們也有個奇妙的旅程﹗我的尼泊爾facebook相簿: : : facebook.com/smallsmalllin我的美食地圖: :

本文由亚洲城88娱乐发布于亚洲城ca88手机版官网,转载请注明出处:哲雲走進森林的好奇旅程,閒遊加德滿都圓滿回

您可能还会对下面的文章感兴趣: